मुंबई –
एसएस राजमौलीच्या बहुप्रतीक्षित आणि बहुचर्चीत ‘आरआरआर’ (RRR) या चित्रपटाच्या प्रदर्शनाचा मुहूर्त अखेर ठरला आहे. येत्या 25 मार्चला हा सिनेमा रिलीज होणार असल्याची माहिती देण्यात आली आहे. ज्यु.एनटीआर, रामचरण आणि आलिया अशी तगडी स्टारकास्ट या सिनेमात आहे. तर सुपरस्टार अभिनेता अजय देवगणही या सिनेमात महत्वाची भूमिका बजावत आहे.

कोरोनाचा प्रत्येक क्षेत्राप्रमाणेच चित्रपटसृष्टीवरही मोठा परिणाम झाला. कोरोनामुळे जिम, रेस्टॉरंट, सिनेमा हॉल अशी सर्व गर्दीची ठिकाणे बंद होती. अलीकडे सर्व काही रुळावर येऊ लागले. दिग्दर्शक एसएस राजामौली सध्या आपला चित्रपट पुढे ढकलण्याच्या मनस्थितीत नाहीत. ओमिक्रॉन संकटाच्या काळात हा चित्रपट मोठ्या पडद्यावर प्रदर्शित होणार आहे.
एसएस राजामौली यांचा ‘आरआरआर’ हा बिग बजेट चित्रपट आहे. यामध्ये दाक्षिणात्य आणि बॉलिवूडमधील अनेक नामवंत स्टार्स एकत्र काम करताना दिसणार आहेत. राजामौली यांनी त्यांच्या निर्णयाचे कारण स्पष्ट केले आणि सांगितले की त्यांचा पीरियड ड्रामा चित्रपट अनेक भाषांमध्ये प्रदर्शित होत आहे. हा बहुप्रतिक्षित चित्रपट असून, हा सिनेमा जुलै 2020 मध्येच रिलीज होणार होता, पण कोरोना आणि प्रोडक्शन विलंबामुळे या सिनेमाच्या रिलीजला आधीच विलंब झाला आहे. त्यामुळे दिग्दर्शक राजामौली यांना त्यांच्या निर्णयावर ठाम राहायचे असून, आता या चित्रपटासाठी ते कोणताही धोका पत्करण्यास तयार आहेत.

मुंबई –

प्रसिद्ध हिंदी चित्रपट दिग्दर्शक आणि बॉलिवूड अभिनेत्री रवीना टंडनचे वडील रवी टंडन यांचे वयाच्या ८६ व्या वर्षी निधन झाले आहे. आज पहाटे ३.३० वाजता त्यांच्या मुंबईतील राहत्या घरी निधन झाले. रवीनाने सोशल मीडियावर पोस्ट शेअर करत ही दुःखद बातमी चाहत्यांना दिली आहे.

रवीनाने तिच्या इन्स्टाग्राम अकाऊंटवरून पोस्ट शेअर करत ही दुःखद बातमी चाहत्यांना दिली आहे. रवीनाने तिच्या वडिलांसोबत फोटो शेअर करत “तुम्ही नेहमी माझ्याबरोबर चालत रहाल, मी नेहमीच तुमची असेन, मी कधीही तुम्हाला जाऊ देणार नाही. लव्ह यू बाबा,” असे कॅप्शन तिने दिले.

दरम्यान, एका वृत्तवाहिनीने दिलेल्या वृत्तानुसार, रवी टंडन हे मागील काही काळापासून त्यांना फुफ्फुसाचा त्रास होता. फुफ्फुसातील फायब्रोसिस नावाच्या आजाराने ते त्रस्त होते. यामुळे त्यांना श्वास घेण्यास खूप त्रास होत होता.

रवी टंडन यांनी ७० आणि ८० च्या दशकात अनेक हिट चित्रपट दिग्दर्शित केले होते. ‘खेल खेल में’, ‘मजबूर’, ‘अनहोनी’, ‘खुद्दार’, ‘जिंदगी’, ‘नजराना’, ‘एक मैं और एक तू’, ‘जवाब’, ‘आन और शान’, ‘निर्माण’, ‘झूठा कहीं का’, ‘चोर हो तो ऐसा’ या चित्रपटांचे दिग्दर्शन करून त्यांनी आपला चित्रपटसृष्टीत ठसा उमटवला. सहाय्यक दिग्दर्शक म्हणून त्यांनी दिग्दर्शन कारकीर्दीची सुरूवात केली आणि काही चित्रपटांचे दिग्दर्शन तसेच निर्मिती केली. १९६० मध्ये रिलीज झालेल्या ‘लव्ह इन शिमला’ या चित्रपटात ते अभिनेता म्हणून देखील झळकले होते.